Kundatænastan
Nógv er at takað støðu til og ivin kann vera stórur.
Niðanfyri hava vit samla og svara nøkrum av teimum mest spurdu spurningunum.
Hoyritól
Hevur fakfelagið tú ert limur í, trygging til hoyritól, hava vit tørv á eini kvittan til afturrindan av hesum.
Á hesa kvittan skalt tú upplýsa navn, føðidato og p-tal, fakfelag, konto nummar og telefon nummar.
Hetta kanst tú senda til okkum á liv@liv.fo ella við at koma á gátt hjá okkum á Kopargøtu 1 í Tórshavn.
Broytt hjúnarstøða
Tú eigur at hugsa um tilskilan soleiðis, at eitt møguligt útgjald við deyða, verður í tráð við tíni ynskir.
Kann eg innseta mín sambúgva at fáa rætt til mína lívstrygging og pensjón, hóast vit ikki eru gift?
Ja, tað kanst tú. Eru tit ikki gift eigur tú at broyta ásetingina á tíni lívstrygging og pensjón, so at útgjald við deyða ikki fer til næsta avvarðandi, men til sambúgvan ístaðin.
Les meira um áseting av tilskilan her.
Eftirlønaruppsparing í Danmark
Tað ber til at flyta hesa uppsparing heim til Føroyar. Tað verður í fyrstu at atløgu rinda avgjald til danska statin á 60%, og síðani verða 40% flutt heim til Føroyar. Tá hesin peningur er settur inn aftur á eina eftirlønarskipan í Føroyum, søkir tú – umvegis TAKS – um at fáa danska avgjaldið afturrindað og flutt inn á tína eftirløn. Hevur tú búð og skattað í Føroyum, meðan inngoldið er til donsku skipanina, verður alt avgjaldið endurrindað. Hevur tú búð part av tíðini í Danmark, verður endurrindað lutfalsliga í mun til tíðina, tú hevur búð í Danmark. Vit hjálpa tær fegin at kanna eftir, hvør nágreiniliga støðan er í tínum føri.
Útgjald vegna deyða
Sorinskrivarin boðar okkum frá í sambandi við øll andlát í Føroyum. Við deyða verður útgoldið til tann, tú hevur tilskilað á tryggingini. Skal upphæddin flytast til búgvið, verður hetta gjørt í samstarvi við Sorinskrivarin.
Inngjaldstrygging í samband við óarbeiðsføri
Inngjaldstrygging merkir, at gjaldið fellur burtur um, arbeiðsorkan verður skerd við 2/3 ella meira. Gjaldið fellur burtur 3 mánaðir eftir at óarbeiðsføri er staðfest, og LÍV rindar hetta, so leingi óarbeiðsføri stendur við.
Mesta longdin á hesum tíðarskeiði er í mun til gjørdu tryggingaravtaluna. Tú finnur áheitan um veiting undir oyðubløð. Tá vit hava móttikið tína áheitan, biðja vit um neyðugar upplýsingar hjá sjúkrahúsverkinum ella tínum lækna, soleiðis at vit kunnu viðgera málið.
Útgjald vegna hættisliga sjúku
Hesar sjúkuavgerðir (diagnosur) er fevndar av tryggingini. Tú finnur áheitan um hesa veiting undir oyðubløð. Tá vit hava móttikið tína áheitan, biðja vit um neyðugar upplýsingar hjá sjúkrahúsverkinum ella tínum lækna, soleiðis at vit kunnu viðgera málið.
Hvat merkir gjaldskái?
Gjaldskái merkir, at rætturin til trygging heldur áfram, hóast inngjaldið steðgar. Gjaldið fyri tryggingarpartin verður mótroknað í uppsparda virðinum á eftirlønini. Fleiri fakfeløg hava í sínum avtalum, at tað sjálvvirkandi verður veittur gjaldsskái í tilsamans 1 ár. Set teg í samband við okkum, um tú ert í iva ella ynskir nærri frágreiðing.
Hví er neyðugt við heilsuváttan?
Heilsuváttan verður nýtt fyri at seta øll tey tryggjaðu so javnt sum gjørligt í tryggingarhøpi. Við innliman meta vit um váðan og áseta treytir og gjald í mun til tær upplýsingar, sum standa í heilsuváttanini.
Frá vegna pensjónsaldur
Vit seta okkum í samband við teg, tá dagurin nærkast. Tá verður greitt frá, hvussu útgjaldið er skipað, og vit spyrja teg, hvar peningurin skal flytast.
Útgjald vegna óarbeiðsføri
Tú hevur rætt til hesa veiting, um arbeiðsorkan er skerd við 2/3 ella meira. Útgjaldið byrjar 3 mánaðir eftir, at óarbeiðsførið er staðfest. Tú finnur áheitan um útgjald undir oyðubløð. Tá vit hava móttikið tína áheitan, biðja vit um neyðugar upplýsingar hjá sjúkrahúsverkinum ella tínum lækna, soleiðis at vit kunnu viðgera málið.
Kundaportalurin MÍTT LÍV
Á kundaportali okkara “Mítt LÍV” fært tú innlit í uppsparing, persónligar tryggingar, samlagstrygging, inngjøld og teknisku uppgerðina.
Ritast kann inn við Samleikanum.
Hevur tú ikki Samleikan, ert tú vælkomin at seta teg í samband við okkum á LÍV.
Er munur á vanlukkutrygging og óarbeiðsføristrygging?
Ja, hetta eru tvær ymiskar tryggingar, ið ikki avloysa hvør aðra.
Vanlukkutrygging fevnir um vanlukkutilburð, sum ásett er í tryggingartreytunum – sum t.d. “brádlig ávirkan uttaneftir, ið elvir til likamsskaða” – v.ø.o ikki vanliga sjúku. Tú fært eitt útgjald í einum, um tú fært varandi mein av tilburðinum, og útgjaldið er í mun til stødd á meini, og í mun til tryggjaða upphædd.
Trygging við óarbeiðsføri fevnir um bæði vanlukku og sjúku, sum hevur við sær, at tú missir arbeiðsførleika í styttri ella longri tíð. Tryggingin verður útgoldin mánaðarliga, ofta ásett sum prosent av løn, vanliga heilt fram til etirlønaraldur, tá ið eftirlønin verður útgoldin.